AQSh Kongressi uzoq tortishuvlar ortidan Ukraina, Isroil va Tayvan kabi davlatlarga yordam yetkazish to’g’risidagi qonun loyihalarini qabul qildi. Xorijiy yordamning umumiy qiymati 95 milliard dollarga teng.
To’rtta alohida qonun loyihasidan iborat paketni Senatning 79 a’zosi ma’qullagan, 18 kishi yordamga qarshi ovoz bergan.
Your browser doesn’t support HTML5
Xalqaro hayot - 24-aprel, 2024-yil - AQShdan yordam, Talabalar isyoni, Flotiliya
Yordamni to’xtatib turgan Vakillar palatasi 20-aprel kuni qonunni qabul qilgan. 311 nafar qonunchi yordam paketini ma’qullab ovoz bergan. Qarshilar 112 kishi.
Uzoq vaqtdan beri yordamni tezlashtirishga undab kelayotgan AQSh rahbari Jo Bayden qonunlar paketini bugun zudlik bilan imzolashini bildirgan.
95 milliard dollarning 61 milliardi Ukrainaga, 26 milliardi Isroilga, qolgan 8 milliardi Hind-Tinch okeani mintaqasida Xitoy bosimiga qarshi yo’naltiriladi.
To’rtinchi qonun loyihasi TikTok’ning AQShdagi aktivlarini sotish talabi, aks holda platformaga taqiq o’rnatishga qaratilgan. Shuningdek, musodara qilingan Rossiya aktivlarini Ukrainaga berish va Eronga qarshi yangi sanksiyalarni joriy qilishni nazarda tutadi.
AQSh rasmiylarining bildirishicha, Ukrainaga qiymati 1 milliard dollarga teng harbiy yordam paketini tayyorlash jarayoni boshlab yuborilgan.
Qonun loyihasi, shuningdek, AQSh prezidentiga Pentagon balansidagi 8 milliard dollarni sarflashga doir qo’shimcha vakolatni ham taqdim etmoqda. Prezident avvalroq 3,9 milliard dollar sarfiyati bo’yicha ana shunday vakolatga ega chiqqani inobatga olinsa, Oq uy rahbari Kongress bilan hisoblashmasdan Ukrainaga jami 11,9 milliard dollarlik yordam ko’rsatish huquqiga ega bo’lmoqda.