Afg’oniston sharqidagi portlashda kamida 14 odam nobud bo’lgan. NATOning bildirishicha, alyans va afg’on zobitlaridan iborat patrul yonida bir odam o’zini portlatgan.
Your browser doesn’t support HTML5
Kundalik Eshittirish
O’lganlar orasida xorijlik uch askar va tarjimon bor. Tolibon hujumni amalga oshirganini aytmoqda.
Mahalliy rasmiylar so’zlariga ko’ra, Xost shahrida motosikl mingan odam patrulga urilib, keyin o’zini portlatgan. Olti nafar oddiy fuqaro, to’rt politsiyachi jon bergani ma’lum. 30 dan ziyodi jarohatlangan.
Bu orada, NATO va afg’on ma’murlari shanba kuni ikki amerikalik va uch afg’on askarini hayotdan olib ketgan otishmani tergov qilmoqda. Tomonlar voqeani har xil tasvirlamoqda.
NATOning dastlabki izohiga ko’ra, gap “ichki hujum” haqida ketmoqda – afg’on zobitlari yoki harbiy formadagi jangarilar alyansga qarata o’t ochgan.
Lekin NATO generali Adrian Bredsho kechagi bayonotida mojaro jangarilar ig’vosi bo’lishi mumkin, degan.
Alyans rasmiylari ta’biricha, afg’on va koalitsiya zobitlari gaplashib turib, to’satdan otishma boshlanib ketgan.
Afg’oniston Mudofaa vazirligi nazarida ziddiyat “tushunmovchilik” mahsuli bo’lgan.
Xalqaro qo’shinlar joriy yilda “ichki hamlalar”, ya’ni mahalliy askarlar hujumi natijasida 52 zobitidan ayrilgan.
