Kuni kecha BMT Xavfsizlik Kengashi harbiy nizolar ichida yashayotgan va ularning qurboni bo’layotgan yosh bolalar taqdiri xususida maxsus rezolyutsiya qabul qildi. Unda maktablar va bolalar kasalxonalariga hujum qilgan guruhlar alohida qoralanadi.
Liviya
BMT Bosh Kotibi Pan Gi Mun Xavfsizlik Kengashi qarorini yuqori baholab, yangi hujjatni bolalar huquqlarini himoya qilish va ularning xavfsizligini ta’minlash yo'lida salmoqli qadam deb atadi.
“Bu rezolyutsiya maktab va kasalxonalar nafaqat tinch hududlar bo’lishi kerakligi, balki ularga qilingan hujumlar alohida ko’rib chiqilib, mening yillik hisobotimga kiritilishi lozimligini talab qiladi. Men bunday o’zgarishni qo’llab-quvvatlayman”,- deydi u.
Hozirda BMT Xavfsizlik Kengashiga raislik qilayotgan Germaniya ham hujjatdan rozi.
Kongo Demokratik Respublikasida jangarilar tomonidan jinsiy tajovuzga uchragan ona va uning bolalari
AQShning BMTdagi elchisi Syuzan Rays mojarolar avj olgan mamlakatlarda ayniqsa yosh avlod aziyat chekadi deydi.
Birma hukumati hali voyaga yetmagan bolalarni qurol olib isyonchilarga qarshi kurashishga majbur qilmoqda yoki Kongo Demokratik Respublikasida bolalar jangarilar qo'lida qurbon bo’lmoqda, deydi diplomat.
AQSh rasmiysi, shuningdek, BMT Xavfsizlik Kengashining yangi rezolyutsiyasi bolalar huquqlarini poymol qilayotgan guruhlar va shaxslarni jazoga tortishda yordam berishini ta’kidladi.