Xitoy hukumati Ilhom To’xtini separatizmda ayblamoqda

Surgundagi uyg’ur guruhi nazarida ziyoli olim, professor Ilhom To’xtiga qarshi jinoiy ayblovlar mutlaqo o’rinsiz. Bu bosim ozchilik elatni himoya qilayotgan boshqa insonlarni qo’rqitishga va sarosimaga tushirishga qaratilgan.

Olti hafta oldin Pekindagi uyidan biror izohsiz olib ketilgan professor To’xtiga shu hafta separatizm aybi qo’yildi.

Olim poytaxtdagi Markaziy universitetda iqtisodiyotdan dars beradi. U Xitoyning uyg’ur aholiga qarshi muomalasi haqida ochiq gapirishdan cho’chimagan, deydi faollar.

Jahon uyg’urlari kongressidan To’lqin Isaning “Amerika Ovozi”ga aytishicha, professor hech vaqt separatizm bilan shug’ullangan emas. Lekin Shinjon-uyg’ur muxtoriyatidagi beqaror vaziyatga yechim topish ustida qayg’urgan.

Xitoy hukumati Ilhom To’xtiga rahmat aytishi kerak, deb hisoblaydi To’lqin Isa. Chunki muallim elatlarlar o’rtasidagi ixtilofni hal qilish yo’llari haqida hukumatga maslahat berib kelgan, deydi Jahon uyg’urlari kongressi rasmiysi.

45 yoshli professor sharhlari uchun avval bir necha bor hibsga olinib, tahqirlangan. Ilhom To’xtining o’tgan yil noyabrida “Amerika Ovozi”ga bildirishicha, politsiya uning mashinasini tintuv qilgan, telefonini tortib olgan va ko’p gapirsa o’ldirib ketishlarini aytib do’q qilgan.

Hozirgi ayblovlar ketidan uyg’ur ziyolisi 10 yilgacha qamalishi mumkin.

Xitoy hukumati esa taqiqlangan Sharqiy Turkiston islomiy harakatiga aloqador uyg’ur terrorchilariga qarshi olishayotganini da’vo qiladi.

Uyg'urlar huquqi Kongressda muhokamada/Uyghur human rights - Congress

Jahon Uyg'urlari yetakchisi Robiya Qodir bilan suhbat/Rebiya Kadeer, Uyghur leader talks to VOA Uzbek