Amerika uzoq yillardan beri O’zbekistonni qishloq xo’jaligini isloh qilib, strategik mahsulot bo’lmish paxta sohasida majburiy mehnatdan butkul voz kechishga undab keladi. Islom Karimov boshchiligidagi hukumat avvaliga bu muammoni tan olmay keldi, lekin keyinchalik G’arb bosimi ostida bolalar mehnatini qonunan man etdi. Lekin majburiy mehnatga hamon chek qo’yilmagan. Har yili yuzlab ming fuqaro paxta terimiga olib chiqiladi. Iqtisodiyotning asosi bo’lgan oq oltin qo’lda teriladi. Huquq tashkilotlari Amerika va Yevropa Ittifoqini bu masala yuzasidan O’zbekistonga bosimni davom ettirishga chaqirib keladi. Yaqinda AQSh Kongressida kechgan muhokamada ham shunday takliflar yangradi. Vashingtonga seminarga kelgan jizzaxlik paxtakor Abdulqosim Mamarasulov va Ezgulik inson huquqlari jamiyati vakili Abdurahmon Tashanov yig’inni yaqindan kuzatdi. Hamkasbim Navbahor Imamova muhokama ketidan ular bilan suhbatda bo’ldi.