AQSh mikrosxema ishlab chiqarish va tadqiqotlar uchun 280 mlrd. dollar sarflaydi

AQSh Kongressi mamlakatda yarimo’tkazgichlar sanoatini rivojlantirish uchun 280 milliard dollar ajratish haqida yangi qonun qabul qildi. Asosiy maqsad muhim texnologiyalarni ishlab chiqarishda Xitoy kabi mamlakatlar bilan raqobatni kuchaytirish.

Bir yarim yildan ziyod davom etgan tayyorgarlik va tortishuvlar ortidan AQSh Kongressi mikrosxemalar sanoatini qo’llab-quvvatlovchi qonunni qabul qildi.

“Bugun Amerika xalqi uchun, mamlakat kelajagi uchun juda yaxshi kun. Ijroga kirgandan keyin bu qonun Amerikani dunyoning havasi keladigan davlatga aylantirgan umid, innovatsiya va kashfiyotlarni qayta uyg’ontiradi”, - dedi Senatdagi demokratlar yetakchisi Chak Shumer.

Vakillar palatasi Spikeri Nensi Pelosiga ko’ra, qonun Amerikaning Xitoyga bog’liqligini kamaytiradi.

“Amerika o’zida yaratilgan, lekin xorijda ishlab chiqariladigan narsaga ortiq qaram bo’lmaydi. Ish o’rinlarini ham shu yerda ochamiz”, - dedi Pelosi.

Qonun asosida AQShda mikrosxema ishlab chiqarishni kengaytiruvchi kompaniyalarga 52 milliard dollar beriladi. Mablag’ning qolgan qismi ilmiy tadqiqotlarni qo’llab-quvvatlashga sarflanadi. Ko’zlangan summa avvalgi taklifdan ancha kam.

Buni ham ko'ring

AQSh Kongressi chiplar ishlab chiqarishni oshirish uchun 52 milliard dollar ajratmoqchi

Ammo to’g’ri yo’ldan qadam tashlandi, deydi qonun tashabbuskorlari.

“Bu mablag’ global texnoligiya poygasida ildamlikni boy bermaslik uchun AQSh tomonidan qo’yilgan birinchi to’lov. U ta’minot zanjirlarining Qo’shma Shtatlarga yoki hamkorlarimizga qarshi qurol sifatida ishlatilishini to’xtatishga qaratilgan. O’tgan yillar davomida Xitoy mahalliy sanoatga, ayniqsa, uzoq muddatda strategik ta’sir kuchiga ega bo’ladigan sohalarga investitsiyani oshirib kelmoqda”, - deydi demokrat senator Mark Uorner.

Iqtisodiyot sekinlashib, inflyatsiya kuchaygan bir paytda buncha mablag’ ajratilishini savol ostiga olayotganlar bor. Qonun kelasi 10 yilda qo’shimcha 79 milliard dollar defitsit yaratishi taxmin qilinmoqda. Demokrat senator Berni Sandersga ko’ra, undan faqat boy korporatsiyalar foyda ko’radi.

“Bu inqirozga Amerikadagi zavodlarini yopib, xorijga ko’chgan kompaniyalar sababchi. Bugun biz ularga o’zlari keltirgan zararni qoplashlari uchun xohlaganlaricha pul beryapmiz”, - deydi Sanders.

Buni ham ko'ring

Rossiya-Ukraina urushi chiplar tanqisligini kuchaytirmoqda

17 respublikachi senator qonunni yoqlab ovoz berdi. Ular Xitoyning o’sib borayotgan ta’siridan xavotirda.

“Bu milliy xavfsizlik masalasi; zarur narsalar o’z uyimizda bo’lishini ta’minlashimiz kerak. Arzonroq yo’li bo’lishini xohlardim, afsuski, hozirgi vaziyatda unday emas”, - deydi Senatdagi respublikachilar yetakchisi Mich Makkonel.

Prezident Jo Bayden imzo chekkach, qonun kuchga kiradi.