AQSh, Xitoy mudofaa rahbarlari Singapurda muloqot qildi

AQSh Mudofaa vaziri Lloyd Oston va Xitoy Mudofaa vaziri Li Shanfu Singapurda Osiyo xavfsizlik forumi doirasida uchrashdi. Har ikkisi bu yig'inning asosiy spikerlari. Pentagonga ko'ra, muloqot qisqa va lo'nda kechgan.

“Rahbarlar ko'rishdi. Izchil muhokama bo'lmadi", - deydi Pet Rayder, Ostinning matbuot kotibi.

Oxirgi oylarda aloqalar taranglashgan. Tomonlar bir-birini zimdan amaliyotlarda ayblaydi. Pentagon AQSh osmonida urib tushirilgan va Xitoyning josuslik vositasi deb taxmin qilingan shar yuzasidan Pekinni savolga tutgan.

Janubiy Xitoy dengizida ham Xitoy aggressiv harakatlarda tanqid ostida, lekin iddaolarga odatda munosabat bildirmaydi yo ularni asossiz deya qoralaydi.

Amerika Xitoy bilan dialogga tayyor ekanini bildirib keladi.

“Biz Pekin bilan ochiq va dangal aloqa qilishni istaymiz. Harbiy aloqalarimiz serqirra va ularni mas'uliyatli ravishda yuritishga bel bog'laganmiz", - deydi Pentagon rasmiysi Rayder.

Markaziy razvedka boshqarmasi direktori Bill Byorns o'tgan oy Xitoyda bo'lgan va rahbariyat bilan gaplashgan.

Osiyo xavfsizligi bo'yicha har yili o'tadigan sammitda e'tibor Osiyo-Tinch okeani hududida mudofaa sohasining barcha jabhalarida vaziyat qanday ekanini muhokama qilish.

Rossiyaning Ukrainadagi urushi yangi pallaga kirgan. Pekin Moskvani quvvatlamoqda va o'zi ham Tayvanga qo'shin yubormoqchi ekaniga ishora qilgan. Bu esa xalqaro hamhamiyatda xavotirni oshirgan.