Bugun AQSh Demokratik partiyasi saylovoldi qurultoyining so’nggi kuni. Tadbir pandemiya tufayli virtual shaklda o’tmoqda. Partiya faollari mamlakatning turli burchaklaridan internet orqali muloqot qilmoqda.
Qurultoyda Jo Bayden prezidentlikka nomzod sifatida rasman e’lon qilindi. Vitse-prezidentlikka tanlangan senator Kamala Harris yirik partiyadan ushbu lavozimga nomzodi ko’rsatilgan ilk qora tanli ayoldir.
Sobiq kongressmen ayol Gabbi Giffords va boshqa ma’ruzachilar Jo Baydenni Trampga qarshi kuchli nomzod deya ta’rifladi.
“Amerika hammaning fikrini eshitishni xohlaydi, garchi so’z tanlash qiyin bo’lsa-da”, - dedi u.
Demokratlar qurultoyda Tramp siyosatini qoraladi, ayniqsa immigratsiya qonunlarini joriy etishdagi ayovsiz harakatlari hamda siyosiy boshpanaga da’vogarlar va hujjatsiz muhojirlarga nisbatan qattiq muomalasi uchun.
Prezidentlikka sobiq nomzod senator Elizabet Uorren Trampning koronavirusga qarshi siyosatini ham tanqid qildi.
“Bugun Amerika koronavirusdan o’lganlar soni bo’yicha dunyoda birinchi o’rinda turibdi, iqtisodiyot parchalanmoqda. Har ikki muammo ayniqsa oq tanli bo’lmagan ko’plab oilalarga og’ir kelmoqda”, - dedi qonunchi.
Sobiq prezident Barak Obamaning aytishicha, Tramp mamlakatdagi xilma-xillikni hurmat qilmaydi, o’z ishining ahamiyatini tushunmaydi.
“Mamlakat ravnaqi uchun Donald Tramp ishiga jiddiyroq yondashadi, oliy lavozim bilan bog’liq mas’uliyatni tushunib, unda demokratiyaga hurmat uyg’onadi deb umid qilgandim. Ammo bunday bo’lmadi”, - dedi Obama.
O’tgan saylovda Trampga mag’lub bo’lgan Xillari Klinton saylovchilarni faol bo’lishga chaqirdi.
“2016-yilda Tramp “menga ovoz bersangiz, nima yo’qotasiz” deb so’ragan edi. Javobini endi bilamiz - sog’liqni saqlash tizimi, ish o’rinlari, yaqinlarimizni”, - dedi u.
Saylovoldi qurultoyni o’tkazishda ijtimoiy sahifalardan foydalanish yangilikdir. Bunday format ish beryapti, deydi mutaxassislar.
Facebook Forum