Liviyada armiya muxolifat o’rnashib olgan shahar va viloyatlarni havodan nishonga olmoqda. Sharqdagi Ajdabiya shahri qattiq talofat ko’rgani aytiladi.
O’tgan oy Liviya rahbari Muammar Qaddafiyga qarshi bosh ko’targan xalq kecha neftga boy port shahar Bregadan ham qochgan.
Hudud ayovsiz o’qqa tutilmoqda. Muxolifat iznidagi Ras Lanuf va Bin Javad shaharlari yana armiya qo’lida.
Yengil qurollangan omma professional armiya, tanklar, og’ir artilleriyaga bas kela olmayapti. Lekin Misrata hamon fuqarolar iznida.
Liviya hukumati isyonchilar safiga o’tgan, lekin qaroridan afsus qilib, qaytgan askarlarni avf etishga tayyormiz, deydi.
Liviya muxolifati va arab davlatlari mamlakat uzra parvozlarni taqiqlashga undamoqda. Toki Qaddafiy kuchlari xalqni qirishni bas qilsin.
G’arb dunyosi arab davlatlari da’vatidan mamnun.
BMT Xavfsizlik Kengashi hozir mana shu masala yuzasidan rezolyutsiya ustida ishlamoqda. Tashabbus boshida Fransiya va Britaniya turibdi.
Aynan Fransiya Liviyada muxolifat tuzgan muvaqqat hukumatni birinchi bo’lib tan oldi.
Biroq Arab Ligasi xorij askarlari Liviyaga kirmasin, deya shart qo’ymoqda.
Qo’shma Shtatlar ham muhokama ishtirokchilaridan. Vashington chora samara beradimi-yo’qmi deya ikkilanmoqda.
AQSh Davlat kotibasi Xillari Klinton bugun Parijda bo’lib, Liviya faollari va Yevropa Ittifoqi rasmiylari bilan ko’rishishi rejalangan.
Qaddafiy ma’muriyati esa chet el neft kompaniyalarini Liviya bilan hamkorlikka, sanoatga qaytishga undamoqda.
Namoyishlar boshlangach, chet ellik mutaxassislar mamlakatni tark etgan edi.
