Amerika va Shimoliy Koreya rahbarlari tarixiy uchrashuvni boshladi. Prezident Trampning maqsadi - Pxenyanni yadroviy qudratdan ayirish. Shimoliy Koreya rahbari Kim Chen Unning maqsadi esa AQShni uning davlati tinchliksevar ekaniga ishontirish va moliyaviy yordam olish.
Tramp va Kim bir-biri bilan tabassum ila ko'rishdi. Ular bir biriga qo'l berar ekan, qisqa gaplashishdi va muloqot boshladi.
Tramp uchrashuvni sharaf deb atadi. Uningcha, tomonlar "a'lo darajadagi aloqalar" o'rnatadi. Kim unga qo'shildi.
"Azaliy g'anim"lardan bugun shunday gaplarni eshitish har ikki xalq uchun olamshumul voqea.
40 minutcha yuzma-yuz va yakka holda gaplashgan Tramp va Kim keyin maslahatchilarini oldiga chaqirdi va kengroq muzokara boshlandi. AQSh Davlat kotibi Mayk Pompeo, Oq uy boshqaruvchisi Jon Kelli, Davlat xavfsizligi bo'yicha maslahatchi Jon Bolton qatnashdi.
AQShga ko'ra, Koreya yarimoroli yadroviy qurollardan xoli hudud bo'lishi kerak. Bu amalda har tomonlama isbotini topishi lozim, deya bildirmoqda Oq uy.
Shimoliy Koreya qurolsizlansa, unga xavfsizlik bobida kafolat beriladi, ya'ni bu davlatga biror boshqa davlat tahdid qilmasligi ta'minlanadi.
Pxenyan yadroviy qurollardan tamoman qutulgani va voz kechgani isbotlanmaguncha, unga biror iqtisodiy yordam ko'rsatilmaydi.
Pxenyan bunga qanchalik tayyor? Kim Chen Un ota-bobosidan qolgan qurollanish siyosatidan yuz o'girishga qanchalik tayyor?
Tomonlar bir-biriga qanchalik ishonadi?
Kim nimadan voz kechib, nimani qo'lga kirgizishga hozir?
AQSh Mudofaa vaziri Jim Mattis deydiki, Singapurdagi muzokarada Koreya yarimorolida Amerika kuchlarini kamaytirish haqida gap ketmaydi.
"AQSh va Janubiy Koreya qo'shinimizni kamaytirish maqsadida emas", - deydi Mattis.
Seul rasmiylari ham buni tasdiqlab, masalani ikki davlatgina hal etadi, deya eslatmoqda.
Facebook Forum