Nevada shtati respublikachilari Mitt Romni uchun ovoz berdi

Bugun AQShning Nevada shtati prezidentlikka da’vogar respublikachilarni elakdan o’tkazdi. Partiyaviy saylovlarda Mitt Romni g’olib chiqdi.

Massachussetts shtati sobiq gubernatori shu kungacha shtatma-shtat o’tgan saralash jarayonida oldin ketmoqda.

Qolgan uch da’vogar, Vakillar Palatasining sobiq spikeri Nyut Gingrich, sobiq senator Rik Santorum va kongressmen Ron Pol poygani hali-beri tark etmasligini aytmoqda.

Dunyoda eng ko'p sayyoh boradigan Las Vegas shahri Nevadada joylashganiga qaramay bu shtat Amerikaning qoloq mintaqalaridan biri. Ishsizlik yuqori, minglab odamlar iqtisodiy inqiroz oqibatida uy-joyi va tirikchiligidan ayrilgan. Iqtisodiy jihatdan ko'proq kazino va turizmga tayanadigan Nevada ish o'rinlari yaratish uchun yangi sohalarni rivojlantirishga harakat qilmoqda. Saylovchi respublikachi nomzoddan shu borada konkret g'oyalar kutmoqda.

6-mart kuni 10 shtat birvarakayiga ovoz beradi. Undan keyin respublikachilardan prezidentlikka nomzod kim bo’lishi yanada oydinlashadi.

Nomzod 6-noyabrda umummamlakat saylovida amaldagi rahbar, demokrat Barak Obama bilan bellashadi.