Learning English
VOA
site logo site logo
Oldingi Keyingi
Breaking News
Yangiliklar

Oregon shtatidagi o'zbeklar: Navro'z dasturxoni atrofida birgamiz

Navro’z yurtdoshlarni bir joyga to’playdigan ulug’ ayyom. Amerikaning Vashington shtati Sietl shahrida yuzlab o’zbeklar va Markaziy Osiyoning boshqa mamlakatlaridan kelgan muhojirlar yig'ilib, do’stlari va hamkasblari bilan bahor bayramini tantana qiladi.

Yillik tadbir Sietl-Toshkent Birodarlik Uyushmasi va Vashington Universiteti bilan hamkorlikda tashkil etiladi. Tinch okeani bo’yida joylashgan Oregon va Vashington shtatlarida Markaziy Osiyodan taxminan bir ming muhojir yashaydi.

Shuhrat Orifjonov (Шухрат Арифджанов) – Xorazm farzandi. Amerikada bir necha yildan beri yashasa-da, kundalik ishi uni ona yurt bilan chambarchas bog’lab turadi.

“Muruvvat tashkiloti, Medical Teams International, shu yerda ishlayman. Markaziy Osiyo, qo’shni mintaqalar va Afrika davlatlariga dori-darmon yetkazamiz va tibbiy yordam ko’rsatamiz”, - deydi mutaxassis.

Sietl shahri har yili Navro'z ayyomini nishonlaydi
Sietl shahri har yili Navro'z ayyomini nishonlaydi
Shuhrat Orifjonov Sietl-Toshkent Birodarlik Uyushmasining faol a’zosi.

Maqsad, deydi u, nafaqat ikki shahar orasidagi hamkorlikni oshirish, balki Amerika va O’zbekiston xalqini bir-biriga yaqinlashtirish.

Madaniy rishtalarni yaxshilashda Navro’z muhim rol o’ynaydi, deydi u.

“Navro’z ayyomi nafaqat O’zbekiston yoki boshqa markaziy osiyolik oilalar bazmi, balki amerikaliklarga o’z urf-odatlarimiz, madaniyatimiz, ayniqsa raqslarimizni namoyish etish uchun imkoniyat deb o’ylayman”.

Dan Peterson, Sietl-Toshkent Birodarlik Uyushmasi rahbarlaridan biri
Dan Peterson, Sietl-Toshkent Birodarlik Uyushmasi rahbarlaridan biri
Amerikada katta bo’layotgan farzandlar, deydi Shuhrat Orifjonov, O’zbekistondan uzoqlashib ketmasligi kerak.

“Vashington Universitetida o’qiyotgan o’zbek talabalar kichkintoylar uchun qo’g’irchoq teatri qo’yib beradi",- deydi u.

"Navro’z ne’matlari – sumalak, xalim va boshqa milliy taomlar tayyorlanib dasturxonga tortiladi”.

Yurtdoshlar diydor ko’rishadi, yangilari bir-birini tanib do’st-birodar orttiradi.

Muhojirlarni bu yerga olib kelayotgan asosiy sabab ham shu – ularning iqtidori.

Shuhrat Orifjonov (Шухрат Арифджанов) tibbiy ko'mak ko'rsatadigan xalqaro tashkilotning yetakchi mutaxassislaridan
Shuhrat Orifjonov (Шухрат Арифджанов) tibbiy ko'mak ko'rsatadigan xalqaro tashkilotning yetakchi mutaxassislaridan
Oregon va Vashington shtatlari – Amerikaning texnologiya o’choqlari sanaladi. Shuningdek, yirik oliygohlar, tadqiqot markazlari va dunyo bo’ylab ishlaydigan nohukumat, notijoriy va insonparvar tashkilotlar shu yerda asoslangan.

Grin karta, AQShda doimiy yashash va ishlash huquqini beruvchi hujjat olib kelganlar ham talaygina.

Sietl-Toshkent Birodarlik Uyushmasi yangi kelganlar va tirikchilik qilishga qiynalib qolgan oilalarga imkon qadar yordam qo’lini cho’zadi.

Uzoqda bo’lsak-da, deydi Shuhrat Orifjonov, vatandan uzilib qolmaganmiz. U o’zi olib borayotgan loyihalar haqida shunday deydi:

“O’zbekiston klinika va kasalxonalarida shifokorlar malakasini oshirish dasturlarimiz bor. O’zbekistondan kelgan mutaxassislar bu yerga kelib ham o’qib ketishadi”.

Shuhrat Orifjonov Portland shahridan turib o’z xalqiga shunday tilaklar yo’llaydi:

“Navro’z ayyomi bilan chin qalbimdan tabriklayman. Oregon va Vashington shtatlarida yashayotgan oilalar nomidan yurtdoshlarimizga sihat-salomatlik tilayman”.

Sietl-Toshkent orasidagi o’ziga xos aloqalar va muhojirlar hayoti bilan bog’liq xilma-xil mavzularda saytimizdan ko’plab maqolalar, lavha va reportajlar topasiz. "Sietl" deb qidirsangiz bas.

  • 16x9 Image

    Navbahor Imamova

    Navbahor Imamova - "Amerika Ovozi" teleradiosining yetakchi multimedia jurnalisti. "Amerika Manzaralari" turkumidagi teledasturlar muallifi. Ko'rsatuvlar taqdim etish bilan birga prodyuser, muxbir va muharrir. O'zbekistonda akkreditatsiyadan o'tgan yagona amerikalik jurnalist. "Amerika Ovozi"da 2002-yildan beri ishlaydi. Jurnalistik faoliyatini 1996-yilda O'zbekiston radiosining "Xalqaro hayot" redaksiyasida boshlagan. Jahon Tillar Universiteti Xalqaro jurnalistika fakultetida dars bergan. Ommaviy axborot vositalari bo'yicha bakalavrlikni Hindistonning Maysur Universitetidan (University of Mysore), magistrlikni esa AQShning Bol Davlat Universitetidan (Ball State University) olgan. Shuningdek, Garvard Universitetidan (Harvard University) davlat boshqaruvi va liderlik bo'yicha magistrlik diplomiga ega. Jurnalistik va ilmiy materiallari qator xalqaro manbalarda chop etilgan. Amerikaning nufuzli universitetlari va tahlil markazlarida so'zlab, ma'ruzalar o'qib keladi. "Amerika Ovozi" oltin medali sohibi. Tashkilotda gender va jurnalistika bo'yicha kengash raisi. Toshkent viloyati Bo'stonliq tumani Qo'shqo'rg'on qishlog'ida ziyoli oilasida ulg'aygan.

    Navbahor Imamova is a prominent Uzbek journalist at the Voice of America. As anchor, reporter, multimedia editor and producer, she has covered Central Asia and the U.S. for more than 20 years on TV, radio and online. Since 2018, she has also been reporting from inside Uzbekistan as the first-ever U.S.-based accredited correspondent in the country. During 2016-2017, she was a prestigious Edward S. Mason Fellow in public policy and management, while earning her Mid-Career Master in Public Administration at Harvard University’s John F. Kennedy School of Government. Navbahor played a pivotal role in the launch of Uzbek television programming at VOA in 2003, and has since presented more than 1000 editions of the flagship weekly show, “Amerika Manzaralari” (Exploring America), which covers American foreign policy focusing on Washington’s relations with Central Asia, as well as life and politics in the U.S. She speaks frequently on regional issues in Central Asia, as well as Uzbek politics and society, for policy, academic, and popular audiences. Her analytical pieces have been published in leading academic and news outlets including Foreign Policy, The National Interest, and the Atlantic. Navbahor also is the founding President of the VOA Women’s Caucus. She began her career at Uzbekistan’s state broadcasting company in Tashkent. She holds a Bachelor of Arts in journalism and mass communication from the University of Mysore, India and a Master of Arts in journalism from Ball State University, Indiana.

Shu mavzuda

XS
SM
MD
LG