Xitoyda bu oy haftasiga 65 million kishigacha koronavirus bilan kasallanishi mumkin. Mutaxassislar hozirgi infeksiya ko'lamiga qarab, shunday taxmin qilmoqda.
Dunyo bo'ylab, bu virusning doimiy yangilanib boradigan turlari o'tgan uch yarim yilda 767 million kishiga yuqdi. Ulardan deyarli 7 millioni kasallikdan jon berdi.
Ekspertlarga ko'ra, vahimaga hojat yo'q. Nyu-Yorkdan olim Raj Rajnarayanan deydiki, ayni damda Xitoyda aniqlanayotgan koronavirus shakllari boshqa mamlakatlarda allaqachon chekingan.
Xitoylik olim Jong Nanshan tahlilicha, hozirgi to'lqin aprel oyida boshlangan.
Pekin koronavirusga qarshi qo'ygan keskin choralarni o'tgan yili yumshata boshlagan. Hukumat ayrim hududlarni hamon qattiq nazorat qilmoqda.
Sian shahridagi test nuqtasi, 13-fevral, 2023
1,4 milliard aholiga ega Xitoyda odamlarning deyarli 80 foizi kamida bir marta virusga chalingan.
Bugungi to'lqin shu bois jamiyatni sarosimaga solmayapti, deydi kuzatuvchilar, chunki odamlar koronavirusga o'rganib ketgan.
Emlangan va qo'shimcha busterlar qabul qilganlar ham virusni yuqtirishi mumkinligini ko'plab biladi. Qolaversa, endilikda dorilar bor.
"Amerika Ovozi" Xitoyda gaplashgan odamlar "Pfizer" kompaniyasi chiqargan preparatlar bilan uch kunda tuzalayotganini aytgan.
Gonkongdan professor Jin Dong-yan nazarida Xitoy mediasi masalani tinimsiz yoritgani uchun ham mamlakatda ahvol ayanchlidek tuyuladi.
Jin kuzatishicha, Amerika bo'ylab ham yangi to'lqinlar bor, ammo jamoatchilik bosiq, chunki uzoqqa cho'zilmaydi.
AQShda shu yilning yanvar oyida haftasiga 5 milliondan ko'p odam virusni yuqtirgan.
2020-yilning boshidan 2023-yilning 27-mayigacha mamlakatda 1,1 milliondan ziyod odam virus tufayli nobud bo'lgan.
Jahon Sog'liqni saqlash tashkiloti COVID-19 bo'yicha global favqulodda vaziyatni 5-mayda bekor qildi.