Ukraina prezidenti Petro Poroshenkoning aytishicha, Yevropa Ittifoqi bilan erkin savdo bitimiga erishish mamlakatga qimmatga tushdi. Bugun Bryusselda hujjatni imzolash marosimi bo’lib o’tdi. Poroshenko uni tarixiy voqea deb atadi.
Qo’shni Rossiya bundan norozi. Prezident Vladimir Putinning aytishicha, bitim bilan bog’liq qarama-qarshiliklar Ukrainani Yevropa va Rossiyadan birini tanlashga majbur qildi. Putin Kiyevdagi hukumatni sharqda harbiy harakatlarni to’xtatishga va u yerdagi kuchlar bilan kelishishga chaqirdi.
Ukraina sobiq prezidenti Viktor Yanukovichning Yevropa Ittifoqi bilan erkin savdo shartnomasini imzolashdan voz kechishi oqibatida vujudga kelgan tartibsizliklar hukumatning almashishiga, Qrimning Rossiya tomonidan qo’shib olinishiga, sharqiy viloyatlarda yangi hukumatga qarshi isyonga olib keldi.
Separatistlar Ukraina armiyasi bilan olishar ekan, minglab ukrainaliklar jon saqlash maqsadida Rossiyaga qochmoqda.
BMTning qochqinlar bo’yicha agentligi bergan ma’lumotga ko’ra, shu kungacha 110 ming ukrainalik qo’shni mamlakatda panoh topgan, yana 54 ming odam uyini tashlab Ukrainaning boshqa viloyatlariga qochgan.
Prezident Poroshenko Yevropa Kengashidagi chiqishida Rossiyani isyonchilarni qo’llab-quvvatlayotganlikda va qurol bilan ta’minlayotganlikda aybladi.
Germaniya kansleri Angela Merkel agar Moskva Kiyev bilan hamkorlik qilmasa, Yevropa Ittifoqi uni yangi sanksiyalar bilan siylashi mumkinligi haqida ogohlantirdi.
AQSh ma’muriyati ham Rossiya Ukrainadagi vaziyatni yumshatishga hissa qo’shmasa, uni jazolashga tayyor ekanini bildirmoqda.