Belarus poytaxti Minksda kecha metro bekatida yo’lovchi tig’iz payt portlash ro’y bergan.12 kishi o'lgan, kamida 200 odam jarohat olgani ma’lum.
Hukumat buni terrorchilik harakati deya ta'riflagan, chunki portlovchi moslamaga mayda temirlar to'ldirib solingani aytiladi.
Jinoyatni sodir etganlar imkon qadar ko'p odamni o'ldirmoqchi bo'lgan, deydi rasmiylar.
Associated Press axborot agentligi og’ir yarador kishilar metrodan olib chiqilayotgani haqida xabar beradi.
Oktyabrskaya stansiyasida chamasi soat 6 larda portlash yangragan. Bekat o’tish joyi bo’lib odamlar doim gavjum.
Guvohlarning aytishicha, metro stansiyasining shifti qulab tushgan.
Voqea terrorchilik harakatimi yoki texnik halokat, bunisi hamon noaniq.
Oktyabrskaya prezident Aleksandr Lukashenko qarorgohidan 100 metr narida joylashgan.
Belarusda siyosiy ziddiyat kuchaygan.
O’tgan yilning dekabrida prezident saylovlari natijalariga qarshi ommaviy namoyishlar o’tib, hukumat uni ayovsiz bostirgan, 700 dan ziyod odam, jumladan, prezidentlikka nomzodlar qamoqqa olingan edi.
19 dekabrgi saylovda davlatni 1994 yildan beri boshqarib kelayotgan Lukashenko mutlaq g’olib deb e’lon qilingan.
Oktyabrskaya bekatiga borgan Lukashenko Vazirlar Mahkamasida favqulodda yig'ilish o'tkazgan.
Prezident voqea ortida turganlarni butun mamlakatni titib chiqib bo'lsa ham topishga va'da bergan.
Muxolifat xavotiri shuki, Lukashenko bu xurujni qalqon qilib, endi har qanday guruh, faollarni yo'q qilishi mumkin.
