Moskvada NTV telekompaniyasining binosi yonida namoyishga chiqqan bir necha odam hibsga olingan.
Yaqinda telekanal prezidentlikka saylangan Vladimir Putinga qarshi namoyishlarda qatnashgan odamlarga pul to’langanini da’vo qilib, hujjatli film namoyish etgan edi.
500 ga yaqin muxolifatchi buni yolg’on deb, NTV ni noxolislikda ayblagan va “Putinsiz Rossiya”, “NTV ga uyat” shiorlari bilan kecha ko’chaga chiqqan.
Namoyish o’tkazish uchun ruxsat bo’lmagani bois politsiya ishtirokchilarni hibsga olgan.
Ular orasida muxolifat yetakchilaridan biri Sergey Udalsov ham bo’lib, hujjatli filmni ishlagan jurnalistlarni “sotqinlar” deb atagan.
Filmda aytilishicha, Putinga qarshi namoyishlarni G’arb moliyalagan.
