Sudan va Janubiy Sudan chegarasida janglar ko’lami kengaygani sari ikki davlat urushga botadi, degan xavotir bor. Chorshanbaga o’tar kechasi qo’shinlar Meyram shahri yaqinida ayovsiz olishgan.
Sudan rasmiylari janubni mag’lub etdik, demoqda. Janubiy Sudan o’tgan hafta chegaradagi neftga boy Xeglig shahrini bosib olgan edi.
Birlashgan Millatlar Tashkilot Xavfsizlik Kengashi kecha ikki davlatni yarashtirish uchun har qanday chorani ishga solishga kelishib oldi. Amerika elchisi Syuzan Raysning aytishicha, kengash sanksiyalarni qo’llashi mumkin.
“Sudan va Janubiy Sudandan olishuvlarni zudlik bilan to’xtatishni talab qilamiz. Janub qo’shinlari Xeglig shahrini tark etishi, Sudan armiyasi esa havo hujumlarini to’xtatishi shart”, - deydi Rays.
Sudan ikkiga bo’linib, o’tgan yil yozida Janubiy Sudan o’zini mustaqil davlat deb e’lon qilgan edi. Tomonlar chegara, neft zaxiralari taqsimoti va fuqarolarning maqomi masalasida hamon tortishib keladi.
