LIVIYA
Liviya rahbari Muammar Qaddafiy tarafdorlarini Brega shahriga va isyonchilar qo'lidagi Bing'oziga yurish qilishga da'vat etgan. Muxolifat hukumat kuchlari o'qlari va yerosti minalari sabab Bregaga kirishi sekinlashganini ma'lum qilmoqda. Juma kungi janglarda isyonchilar kamida 10 odam yo'qotgan.
Shanba kuni Turkiyada 30 mamlakat diplomatlari uchrashib, Liviyada muxolifat tashkil etgan Muvaqqat milliy kengashni bu mamlakatning qonuniy hukumati deb tan olgan. Jumladan shu paytgacha ikkilanib kelgan Qo'shma Shtatlar ham.
YAMAN
Yaman muxolifati prezident Ali Abdulla Solihning 33 yillik hukmronligiga chek qo'yish maqsadida muvaqqat kengash tuzgan. Unga 17 vakil kiradi. Sobiq mudofaa vaziri general Abdulla Ali Alayva qurolli kuchlarga qo'mondon etib tayinlangan.
Mamlakat bo'ylab minglab odamlar prezident iste'fosini talab qilib namoyish qilishda davom etmoqda. Ali Abdulla Solih hali ham Saudiya Arabistonida. Iyun oyida olgan jarohatidan davolanmoqda.
SURIYA
Suriya muxolifati Turkiyada uchrashib, prezident Bashar al-Assad hukumatini ag'darish yo'llarini muhokama qilgan. Istanbuldagi majlisda yuzlab faollar ishtirok etgan. Ular Suriya hukumati zulmidan to'yganini aytmoqda. Kecha xavfsizlik kuchlari namoyishchilarni o'qqa tutib, kamida 32 kishini o'ldirgan.
Bu paytda Turkiyaga safar qilgan AQSh Davlat kotibi Xillari Klinton mahalliy rasmiylar bilan Suriyadagi vaziyatni muhokama qilgan.
Suriya muxolifati Damashqda uchrashishi kerak edi, ammo xavfsizlik kuchlari majlis joyini o'rab olib, rejani puchga chiqargan.
Yaqin Sharqda nima gap? 17-iyul, 2011-yil tafsilotlari
Suriya muxolifati Istanbulda uchrashmoqda, 16-iyul, 2011-yil