BMT Bosh kotibi Antoniu Guterrish XAMASni garovdagi yahudiylarni darhol qo'yib yuborishga va Isroilga xurujni to'xtatishga undamoqda. Guterrish Isroilni Falastin ahliga zarar yetkazmaslikka va xalqaro qonunlarni buzmaslikka chaqirmoqda.
"Men Falastin xalqi dardini tushunaman va tan olaman, ammo terrorni asoslab bo'lmaydi. Odamlarni o'ldirish va o'g'rilash asossiz harakatdir", - deydi BMT rahbari Nyu-Yorkdagi idorasida so'zlar ekan.
"Hujumlarni bas qiling va qo'lingizdagilarni ozod eting", - deydi Guterrish.
XAMAS 7-oktabr kuni Isroilga bir paytda bir necha joyda hamla qilib, yuzlab fuqarolarni o'ldirgan. Guruh yana yuzlab yahudiyni olib qochgan. Garovdagilar orasida chet elliklar ham bor.
Guterrish G'azo sektori tok va gazdan uzilganidan norozi. Ikki milliondan oshiq aholiga ega hudud qamal ostida.
"Gumanitar holat G'azoda shundoq ham og'ir edi. Endi esa yanayam qiyinlashadi", - deya xavotirlanadi u.
BMT Bosh kotibiga ko'ra, Isroil G'azoga insonparvarlik yordami kirishi uchun yo'l berishi kerak.
G'azoda o'tgan uch kun ichida 120 mingdan ziyod odam boshpanasiz qolgan. Suv va sanitariya tizimlariga zarar yetgan. 400 mingdan oshiq kishining hayoti ayni damda qil ustida. G'azoda bittagina tok ishlab chiqarish inshooti bor.
BMT Oziq-ovqat dasturi G'azoga madad yetkazishni boshlagan, ammo to'siqlar talay.
Guterrish deydiki, mintaqa hukumatlarini mojaro keng tus olmasligi uchun harakat qilishi kerak. Ular qon to'kishni qoralashi lozim, deydi u.
BMT Bosh kotibi fikricha, urush ortidagi sabablarni aniq va azaliy omillarga ega.
"Nafrat, keskinlik va qonxo'rlik charxpalagini to'xtatishimiz zarur", - deydi Guterrish.
BMT ikki mustaqil davlat tarafdori. AQSh ham shu taklifni olg'a suradi, ya'ni, bir-birini tan oladigan va o'zaro urushmaydigan Isroil va Falastin davlatlari bo'lishini. Har ikkisi xavfsiz yashay olishi kerak, deydi Guterrish.
