Nyu-Yorkning Long-Aylend tumanida musulmonlar jamiyati kengayar ekan, namozxonlar birlashib, o’z ehtiyojlari uchun yangi masjid qurishdi.
“Bu masjid oldidan har gal o’tganimda yuragim iftixorga to’ladi. Chunki biz g’ozal bir bino bunyod etganimiz-ki u musulmonlarning o’ziga xosligini ko’rsatib turadi”,- deydi mahalliy musulmon Hasan Usken.
Long-Aylendda musulmonlar ko’payar ekan, islomiy markazga ehtiyoj ortdi. Jamoat xayriya yo’li bilan katta masjid bunyod etdi.
“Biz Sulaymoniya masjidida turibmiz. Bu - men ishlaydigan tashkilotning ajralmas bir qismi. Bu kabi masjidlar Amerikada juda ko’p, deyarli har bir shtatda bor. Hatto Kanada, Janubiy Amerika mamlakatlarida, Lotin Amerikasida ham bizning vakolatxonamiz, masjidlarimiz bor. Bu masjid Long Aylendda joylashgan. U bir yil oldin Ramazonda ochildi”, - deydi imom Serjan Kaliyev.
2,5 gektar hududni egallagan Sulaymoniya masjidi Bruklindan 80 kilometr uzoqlikdagi Long-Aylend tumani Diks tepaligida joylashgan.
Ikki qavatli bino sathi 1,5 ming metr kvadratdan iborat. Uning ichidagi masjid va o’quv xonalari zamonaviy dizaynda bezatilgan.
“Hammasi qariyb o’ttiz yil oldin, binoning yonida joylashgan bir hovlida masjid ochishimizdan boshlangan. O’shandayoq bizning faollarimiz mana shu kabi masjid bunyod etishni orzu qilgandilar. 3 yil oldin ruxsatnomasini oldik va uning qurilishini dindoshlarimiz bilan birga boshladik. Mana shu darajaga erishdik. Jamoatimiz keng. Yaqinda Qurbon hayitida bu masjid namozxonlarga liq to’ladi. Bu kunlarga erishishimiz uchun juda ko’p qadam bosganmiz. Uning qurilishida hissa qo’shgan atrofdagi mahallalar musulmon ahli, Amerika birlashgan musulmonlar uyushmasidan mamnunmiz”, - seydi Mahmud Solio’g’li ismli jamoat vakili.
Buni ham ko'ring AQSh-Meksika chegarasida musulmon muhojirlarga maxsus boshpana xizmat qilmoqdaMasjid qurilishiga mahalliy musulmonlar va Amerika birlashgan musulmonlari uyushmasi jami 4 million dollar atrofida mablag’ sarflagan.
“Bu masjidning asosiy qismi - namozxona. Masjiddan tashqari o’quv xonalari bor. Bu yerda esa biz jamoatimiz bilan namoz o’qiymiz”, - deydi Kaliyev.
Masjidda bir vaqtda 300 namozxon ibodat qilishi uchun sharoit yaratilgan.
Uning shifti baland, mehrobi zamonaviy uslubda bunyod qilingan.
“Bino muhtasham. Xususan namozxonasi. Biz o’quv dasturlarida qatnashib turamiz”, - deydi 12 yashar afg’onistonlik o’zbek oilasi farzandi.
“Yoshlarimiz uchun ta’lim muhimroq. Biz o’z dinimiz, o’zligimizni yo’qotmasligimiz kerak. Shuning uchun ham ana shu kabi muassasalarga ehtiyojimiz bor. Namozxonlar uchun masjid albatta zo’r, lekin biz yoshlarimizni Islomga o’qitishimiz kerak. Biz o’tib ketamiz, lekin yoshlarimiz masjid va dinimiz haqida qayg’ura bilishi kerak, menimcha”, - deydi afg’onistonlik o’zbek Temur.
Masjidga kiraverishda o’quv xonalari joylashgan. Ularda 30-50 o’g’il bolalarga asosiy fanlar qatori diniy ta’lim beriladi.
Masjd mahalliy musulmonlarni xayriya ishlari atrofida ham birlashishtirgan.
Buni ham ko'ring Saudiya Arabisoni haj ziyoratchilari sonini oshirmoqchi: bu ekologiyaga qanday ta'sir qiladi?“Bu yerda tez-tez turli tadbirlar o’tadi. Bundan tashqari biz xayriya ishlari bilan mashg’ulmiz. Odamlarning qurbonliklarini ehtiyojmandlarga yetkazamiz. Bungacha biz ularni Afrika musulmonlariga yuborardik, bu yil ularni Turkiya va Suriyaga, zilziladan aziyat chekkanlarga yuborayapmiz. Bu ish ustida nafaqat mazkur masjid, balki boshqalari ham mashg’ul va maqsadimiz kamida mingta qurbonlikni u yurtlarga yetkazish”, - deya tushuntiradi imom.
Masjid turfa millat namozxonlari uchun har kuni ochiqligi, undagi o’quv markazi diniy ta’lim olishga ehtiyojmand oilalarga yil davomida dasturlarini taklif qilayotganidan mahalliy musulmonlar xursand.
“Ushbu masjid - uyimiz, oilamiz, borligimizdir”, - deya xulosa qiladi long-aylendlik namozxon Hasan Usken.